المفيد فى سيرة كورونا العنيد

16/03/2020 09:12


أحمد كامل

أنا مهتم بالتاريخ واللى زيى طبيعى جداً إن مخهم يبقى متركب بالعكس .. يعنى مع أى حدث مش بيفكروا فى اللى جاى قد ما بيفكروا ده حصل فين قبل كده وحصل إزاى ؟ .. الصراحة يا اخوانا كورونا لحد دلوقت ومقارنة بتاريخ الأوبئة يعتبر فيروس لسه فى الحضانة .. يعنى الطاعون مثلاً حصل فى أماكن كتير أوى لدرجة إن كوارثه بقت تتسمى بأسامى الأماكن اللى حصل فيها ولو حبينا نذكر بعض محطات الطاعون اللى حصلت تاريخياً هنلاقى الآتى :

 

* سنة 430 قبل الميلاد حصل طاعون فى أثينا إستمر 4 سنين خد فى وشه 300 ألف يونانى ودول كانوا بيمثلوا ثلث سكان العاصمة اليونانية وقتها ..

 

* سنة 165 ميلادياً حصل طاعون فى جيش الإمبراطورية الرومانية اللى كان بيحاصر أحد المدن فى العراق فى عهد الإمبراطور الشهير ماركوس أوريليوس بتاع فيلم ( Gladiator ) .. العدوى إتنقلت من الجيش ده وإنتشرت فى مناطق كتير من الإمبراطورية .. العدد التقريبى للمتوفين كان حوالى 5 مليون رومانى لدرجة إنه كان بيموت 2000 واحد كل يوم فى فترة ذروة المرض .. الطاعون ده إتسمى الطاعون الأنطونى للى حابب يقرأ عنه ..

 

* سنة 541 ميلادياً إنتشر طاعون فى القسطنطينة عاصمة الإمبراطورية الرومانية الشرقية فى عهد الإمبراطور جستنيان الأول وخد فى وشه بتاع 30 مليون بنى أدم .. الظريف فى الموضوع إن الروايات بتقول إن الطاعون ده بدأ أساساً فى صعيد مصر اللى كانت المصدر الأساسى للحبوب اللى بتستوردها الإمبراطورية وعن طريق الشحنات دى إتنقل الطاعون لهناك عن طريق البراغيث والفيران اللى كانت مستخبية فى سفن الشحن ..

 

* سنة 640 ميلادياً - 18 هجرياً حصل طاعون عمواس .. بالأساس هو كان واحد من موجات الطاعون اللى لسه قايلين عليه حالاً وحصل فى مدينة عمواس الموجودة فى فلسطين ومنها إنتشر فى الشام كله ومات فيه عدد كبير من الصحابة .. أغلب الروايات حصرت عدد المتوفين بين 25 ألف : 30 ألف ..

 

* سنة 1347 حصلت أكبر هجمة للطاعون فى التاريخ .. من شدة الهجمة وكثرة عدد اللى ماتوا تم تسمية الكارثة دى بالطاعون الأسود .. وباء شامل إنتشر فى القارة الأوروبية ودول حوض البحر الأبيض المتوسط خد فى وشه ما لا يقل عن 75 مليون إنسان وفى تقدريرات رفعت العدد للضعف وأكتر .. يعنى من 150 : 200 مليون بنى أدم .. حوالى 45 % من سكان أوروبا ماتوا .. كان عادى جداً إن خلال أسابيع تلاقى 50 أو 60 % من سكان قرية أو مدينة ماتوا .. خد التقيلة بقى .. الطاعون ده وصل مصر وموت حوالى 40 % من سكانها أيام دولة المماليك البحرية بسبب إن مصر وقتها كانت محطة تجارية أساسية بين أوروبا ودول آسيا .. أرقام الوفيات فى مصر كانت مرعبة .. فى ذروة المرض خرجت من إسكندرية 700 جنازة فى يوم واحد .. فى القاهرة وصل العدد ل 1000 جنازة فى اليوم .. دمنهور والبحيرة والبرلس مات

منهم أعداد لا تحصى والصيد والتجارة وقفوا تماماً ووصل عدد الوفيات لأكتر من مليون إنسان على أقل تقدير ..

 

* سنة 1720 حصل طاعون فى مدينة مارسيليا الفرنسية مات فيه حوالى 100 ألف إنسان خلال 3 سنين بس بعد ما انتشر المرض داخل الأراضى الفرنسية .. حاجة كده فى السريع مطولتش كتير ..

 

* سنة 1855 حصل طاعون فى مقاطعة يونان فى جنوب الصين وإنتشر تدريجياً لحد ما مات بسببه أكتر من 50 ألف إنسان .. الغريب فى الطاعون ده إن تبعاته إستمرت لمدة كبيرة جداً وصلت لأكتر من 50 سنة وإنتشر بالأساس فى الهند وباكستان وشوية دول آسيوية وكمان أستراليا لحد ما وصل إجمالى عدد القتلى بسببه لحوالى 13 مليون إنسان ..

 

ـــــ

 

لو سبنا الطاعون على جنب شوية ودخلنا فى الأنفلونزا فهنلاقى الآتى :

 

* سنة 1889 إنتشر فيروس الإنفلونزا فى روسيا وخلال سنة واحدة بس إنتشر الفيروس فى أوروبا وأمريكا الشمالية والجنوبية وأسيا لحد ما تحول لوباء مات بسببه حوالى مليون إنسان ..

 

* سنة 1918 وبعد إنتهاء الحرب العالمية الأولى صحى العالم على وباء جديد هو الإنفلونزا الإسبانية .. الفيروس ده إنتشر خلال أخر سنتين فى الحرب ولكن الصحافة فى الدول العظمى كتمت على الخبر وقللت من أعداد القتلى عشان معنويات الجنود متتأثرش .. البلد الوحيدة اللى ركزت عليه ونشرت تفاصيله كانت إسبانيا عشان كانت على الحياد فى الحرب ومهمهاش حاجة فتم تسمية الوباء بالإنفلونزا الإسبانية نسبة ليها .. الفيروس ده كان ثانى أبشع حاجة حصلت فى تاريخ الأوبئة بعد الطاعون الأسود لإن عدد المصابين بالفيروس وصل لأكتر من نص مليار إنسان فى العالم مات منهم حسب أعلى التقديرات 100 مليون إنسان يعنى نسبة وفيات قربت من 20 % وده رقم مهول جداً لو قارناه بفيروس زى كورونا مثلاً ..

 

* سنة 1968 إنتشر فيروس الإنفلونزا فى مدينة هونج كونج الصينية لدرجة إن حوالى نص مليون واحد من سكان المقاطعة إتصابوا بالمرض وبدأ بتحول لوباء .. بعدها إنتشر المرض ووصل لأكتر من مكان فى آسيا ووصل كمان لأمريكا ولكن اللى مشهرش الوباء ده إن عدد وفياته كانت قليلة نسبياً .. يعنى فى حدود 100 ألف بس فى العالم كله ..

 

ـــــ

 

أرقام زى دى بتخلى فيروس زى كورونا غلبان جداً على مستوى الأرقام .. الإيدز مثلاً تسبب فى وفاة حوالى 40 مليون إنسان من وقت إكتشافه .. الكوليرا تسببت فى وفاة أكتر من 30 مليون فرد .. التيفود قتل حوالى 10 مليون إنسان وغيرهم كتير ..

 

طبعاً ده مينفيش خطورة كورونا وإنه لسه فى بدايته ولكن نتمنى إنه يطلع فيروس على قده زى سارس وإيبولا وإنفلونزا الطيور والخنازير اللى أرقامهم تعتبر بسيطة جداً وتم بالفعل السيطرة عليهم بشكل كبير .. تفاءلوا خير يا جماعة وإهتموا بالنظافة الشخصية وربنا يسترها علينا ..

 

تصبحوا على خير ..

 

ـــــ



لمعرفة المزيد

تعليقات
اضف تعليق

الاسم

البريد الالكترونى

التعليق