اللي مش عارف يدخل كلية ايه يعمل ايه؟!

16/07/2019 04:36

ج / سؤال جميل:

 

❶. تبدأ باستراتيجية الاستبعاد

إيه الكليات الي مستحيل تفكر فيها؟

بعد ما تحذف بعض الأسماء .. تنضف القائمة وتظبطها قدامك.

 

الأسماء الي قدامك تقريبا هتنقسم لنوعين

نوع ميولك له يتعدى الـ 60%

ونوع أقل من 40%

 

❷. نبدأ البحث في النوع الأول

هنحدد مثلا 3 أو 4 كليات أنا محتار بينهم .. مثلا نفسي أدرس كمبيوتر ومحتار بين

هندسة قسم كمبيوتر ... حاسبات ومعلومات .. علوم قسم كمبيوتر

أو عايز أدرس لغة عربية ومحتار بين

دار علوم ... آداب قسم لغة عربية .. تربية قسم لغة عربية.

 

❸ . مرحلة جمع المعلومات من الثقات

هتروح لكل كلية من دول تسأل عن لائحتها أو قائمة مقرراتها .. إيه الي بيُدرّس فيها بالتفصيل؟ .. ممكن تجيب جداول الفرق بتاعتها وكل المعلومات دي من النت عادي .. بتكون مرفوعة على المواقع الرسمية لها.

 

تبدأ تاخد المقررات وتبحث عنها على جوجل واليوتيوب .. وتقرأ وتسمع فيها لتكوّن تصوّر مبدأي عن المنهج الي بيتم تدريسه والأهداف الرئيسة الي بتسعى كل كلية لتحقيقها في خريجها.

 

❹. المرحلة الرابعة هي تحصيل الخبرات من المجربين

 

بعد ما تكون كونت تصور .. تسأل طلبة الكلية دي .. إيه المزايا والعيوب؟ .. المواد .. الدكاترة .. الإدارة .. الامتحانات .. النظام التعليمي .. ولو بتفكر في الشغل وليس طلب العلم فقط فاسأل: إيه الفرص الي متاحة قدامي بعد التخرج فيها؟

 

وبالمناسبة هي : بنتخرج في الكلية مش بنتخرج منها

 

❺. انزل بسقف توقعاتك في أي كلية حتى لا تُصدم.

 

❻. قعدة من النفس تحلل فيها اهتماماتك - نقاط ضعفك وقوّتك - فرصك - تحدياتك - مهاراتك.

 

ثم استخر الله عز وجل واختر ما يميل له عقلك وقلبك أنت دون الاكتراث لأي رأي آخر حولك .. ثم كن متصالحا مع فكرة أن اختيارك قد يكون خاطئا فيما بعد .. بعد أن يزداد وعيك وخبرتك وتجاربك فلا تجلد ذاتك لأنك اخترت الآن بناء على معطياتك الآن وليس معطياتك ومعلوماتك بعد سنين.. فإن بدأت في طريق وتيقنت من أنه لا يناسبك فلا تتردد من البداية أن تقف وتغير مسارك فورا أيضا دون الاكتراث لمن حولك.. المهم تجرب وما تقفش مكانك أو تعافر في طريق لمجرد إنه رسموه ليك أو عشان ترضي غيرك على حساب حياتك.

 

وفقك الله يا حبيب ").

 

أحمد عبد المنصف

 



لمعرفة المزيد

تعليقات
اضف تعليق

الاسم

البريد الالكترونى

التعليق